प्रदर्शनरत फिल्म ‘परदेशी २’ को ‘कुरा सिधा छ’ गीत सार्वजनिक

प्रदर्शनरत फिल्म ‘परदेशी २’ को डान्सिङ नम्बरको गीत सार्वजनिक गरिएको छ।

बुधबार म्युजिक नेपाल युट्युब च्यानलमार्फत फिल्मको ‘कुरा सिधा छ’ बाेलको गीत सार्वजनिक गरिएको हो। यसअघि केही दृश्य समावेश गर्दै लिरिकल शैलीमा गीत सार्वजनिक गरिएको थियो।

प्रताप दास र मिना निरौलाको स्वर रहेको गीतको भिडिओमा अभिनेता प्रकाश सपूत र अभिनेत्री वर्षा शिवाकोटी प्रस्तुत छन्। बिबि अनुरागीको शब्द तथा संगीत रहेको गीतको भिडिओलाई गोविन्द राईले कोरियोग्राफी गरेका हुन्।

गत शुक्रबारदेखि प्रदर्शन भएको फिल्मले दर्शकको उत्साहजनक साथ पाइरहेको छ। फिल्मले सोमबारसम्म २ करोड हाराहारी ग्रस कलेक्सन गरेको रिपोर्ट निर्माण टिमले सार्वजनिक गरेका छन्।

नारायण रायमाझी निर्देशित फिल्मको कथा एवम् पटकथा रमेश बिजीले लेखेका हुन्। फिल्ममा प्रकाश र वर्षासँगै केकी अधिकारी, प्रशान्त तामाङ, दीलिप रायमाझी, नीर शाह, रमा थपलिया, देवेन्द्र बब्लु, सविन बास्तोला, रोशनी कार्कीलगायत कलाकारको अभिनय छ। राजेश वंशल र निर्देशक रायमाझी मिलेर फिल्म निर्माण गरेका हुन्। सेतोपाटी