लोकसेवा आयोगको वेबसाइटमा समस्या, परीक्षार्थीलाई प्रवेश पत्र निकाल्न हैरानी

काठमाडौँ । लोकसेवा आयोगको वेबसाइटमा समस्या देखिँदा परीक्षार्थीहरूले सास्ती खेपिरहेका छन् । मंगलबारदेखि वेबसाइटबाट एडमिट कार्ड निकाल्न नमिलेपछि परीक्षार्थीहरू  सङ्कटमा परेका हुन् ।

आज दिउसो १ बजेदेखि कृषि समूह पाचौं संघको परीक्षा रहे पनि एडमिट कार्ड झिक्न नमिल्दा विद्यार्थीहरू अन्योलमा परेका हुन् । आयोगको कार्यालयमा गुनासो गर्दा पनि समस्या समाधानतर्फ कुनै पहल नभएको विद्यार्थीहरूको आरोप छ ।

यस विषयमा आयोगकी प्रवक्ता गीताकुमारी होमागाईले समस्या देखिएमा समाधानको पहल गर्ने बताइन् । ‘यस्ता समस्या बेलाबेलामा देखिने गरेको छ । आज पनि समस्या देखिएको हुन सक्छ, हामी हेर्छौ’ उनले भनिन् ‘विद्यार्थीले पनि पहिल्यै एडमिट कार्ड नलिँदा समस्या देखिएको हो, यो समस्याको समाधान खोजिनेछ ।’  रातोपाटी संवाददाता