यो साता बिहीबार नै रिलिज भए फिल्म, ‘फर्की फर्की’ र ‘पुजार सार्की’ आजबाट हलमा

नेपालमा फिल्महरु शुक्रबार रिलिज हुने परम्परा रहेकोमा यो साता बिहीबारबाट नै प्रदर्शन आरम्भ भएको छ। बुद्ध जयन्तीको अवसर पारेर दुईवटा फिल्म ‘फर्की फर्की’ र ‘पुजार सार्की’ आजबाट एकसाथ प्रदर्शनमा आएका हुन्।

केही दिन अघिदेखि अग्रिम टिकट बुकिङ खुला गरिएका फिल्मले उत्साहजनक शोहरू पाएका छन्। हलले यी फिल्मलाई बराबरीजसो शो दिएका छन्।

रोहित अधिकारी फिल्म्सको प्रस्तुति रहेको ‘फर्की फर्की’ मा अनमोल केसी, जसिता गुरुङ, रवि काफ्ले, समृद्धि अर्याललगायत कलाकारहरू मुख्य भूमिकामा छन् । सुयोग गुरूङले यो फिल्मलाई लेखन एवं निर्देशन गरेका हुन्।

त्यस्तै, दिनेश राउतको निर्देशन रहेको ‘पुजार सार्की’ मा आर्यन सिग्देल, प्रदीप खड्का, पल शाह, अञ्जना बराईली, परीक्षा लिम्बू लगायतका कलाकारहरू मुख्य भूमिकामा छन्। सुवास भुसाल निर्माता रहेको फिल्मको कथा विकास सुवेदीले लेखेका हुन् ।

प्रचार सामग्रीबाट राम्रो हाइप बनाएका कारण प्रतीक्षित मानिएका दुवै फिल्मले बम्पर ओपनिङ गर्ने अपेक्षा दुवै पक्षको छ।

यसअघि रिलिज भएका केही फिल्महरु पनि हलमा छन्। सेतोपाटी