Loktantra Khabar National Weekly
Ad

मलंगवामा सार्वजनिक बस पार्किङले विद्यालयको पठनपाठनमा बाधा

लोकतन्त्र खबर
१७ चैत्र २०८१

मनोज यादव-
सर्लाही,चैत्र १८
सार्वजनिक बसको पार्किङले गर्दा मलंगवा स्थित एक विद्यालयको पठनपाठनमा बाधा उत्पन्न भएको छ। मलंगवा नगरपालिका वडा नम्बर २ झण्डा बजार नजिकै रहेको गडगिफ्ट बोर्डिङ स्कुल नजिक अव्यवस्थित रुपमा सार्वजनिक बसहरु पार्किङ गरिँदा विद्यालयको पठनपाठनमा अवरोध सिर्जना भएको हो।
विद्यालयका प्रधानाध्यापक राजनारायण रायका अनुसार सोही वडामा रहेको नयाँ बसपार्कबाट बस नचलाई विद्यालय नजिकको सडकको दुवै छेउमा पार्किङ गर्ने ,विद्यालयको गेट अगाडी यात्रु ओराल्ने र चढाउने तथा बस खुल्नु भन्दा आधा घण्टा अगावै हर्न बजाइने गरेको छ। यसले विद्यार्थीहरूको ध्यान विचलित गर्ने तथा पठनपाठनमा असर पार्ने प्रधानाध्यापक रायले बताएका छन्। निरन्तर हुने शोरगुलका कारण शिक्षक र विद्यार्थीहरूले अध्ययन(अध्यापनमा कठिनाइ भोग्नु परिरहेको छ।
विद्यालय प्रशासनले पटक–पटक सम्बन्धित निकायमा गुनासो गरे पनि हालसम्म कुनै प्रभावकारी समाधान नआएको प्रधानाध्यापक रायले जानकारी दिए। विद्यालयले यो समस्याको तुरुन्त समाधान गर्न नगरपालिकासँग माग गरेको छ।
अभिभावक तथा विद्यार्थीहरूले पनि बसपार्क व्यवस्थापन सुधार्न माग गर्दै विद्यालय क्षेत्रको शान्त वातावरण जोगाउन आग्रह गरेका छन्।

प्रतिक्रिया दिनुहोस्: