पत्रकारको हत्या, संचारगृह र संचारकर्मीमाथि भएको आक्रमणको विरोधमा सर्लाहीका पत्रकारले बुझाए ज्ञापनपत्र

लोकतन्त्र समाचारदाता—
मलंगवा, चैत १८
पत्रकारको हत्या, संचारगृह र संचारकर्मीमाथि भएको आक्रमणको विरोधमा सर्लाहीका पत्रकारले ज्ञापनपत्र मार्फत सरकारको ध्यानाकर्षण गराएका छन् । सोमबार
नेपाल पत्रकार महासंघ सर्लाही शाखाको नेतृत्वमा जिल्लाका पत्रकारहरुले प्रमुख जिल्ला अधिकारी तुलसीबहादुर श्रेष्ठमार्फत सरकारलाई ज्ञापन–पत्र बुझाएका हुन् ।
केन्द्रको देशव्यापी आन्दोलनको कार्यक्रम अन्तर्गत प्रजिअलाई  ज्ञापनपत्र बुझाइएको  महासंघ सर्लाही शाखाका अध्यक्ष ओमप्रकाश ठाकुरले जानकारी दिए।
गत शुक्रबार काठमाडौंको तीनकुने घटनामा ज्यान गुमाएका पत्रकार सुरेश रजकको हत्याबारे गहिरो अनुसन्धान गरी हत्यामा संलग्न सबैलाई फौजदारी अभियानमा कारवाही गर्न तथा उनको परिवारलाई राहत प्रदान गर्न, संचारमाध्यम र संचारकर्मीमाथि आक्रमण गर्ने सबैलाई कानूनी कठघरामा ल्याउन तथा क्षति पुर्याइएका संचारगृह र संचारकर्मीलाई यथोचित क्षतिपूर्तिका साथै घाइते पत्रकारको उपचारको प्रवन्ध मिलाउन महासंघले माग गरेको छ ।
यस्तै विगतमा प्रेस तथा अभिव्यक्ति स्वतन्त्रता हननका घटनाहरुमा संलग्नलाई तत्काल कानूनी कारवाही गर्न र भविष्यमा संचारमाध्यम र संचारकर्मीको सुरक्षाको उचित प्रवन्ध मिलाउन पनि  महासंघले माग गरेको छ । महासंघले एक साताभित्र माग सम्वोधन हुने विश्वासनीय आधार निर्माण गर्न माग गरेको छ ।
शुक्रबारको घटनापछि नेपाल पत्रकार महासंघले तय गरेको आन्दोलनको कार्यक्रमअन्तर्गत सर्लाहीका पत्रकारले शुक्रबार सदरमुकाम मलंगवामा विरोध र्याली र शनिबार आ–आफ्नो कार्यकक्षमा कालोपट्टी बाँधेर काम गरेका थिए ।