नक्कली इन्स्पेक्टर बनेर धाकधम्की दिने युवक लागू औषधसहित पक्राउ

लोकतन्त्र समाचारदाता—
सर्लाही,चैत २१
नक्कली प्रहरी इन्स्पेक्टर बनेर धाकधम्की दिने एक सर्लाहीको मलंगवा स्थित एक गेस्ट हाउसबाट लागू औषधसहित पक्राउ परेको छ।पक्राउ पर्नेमा हरिवन नगरपालिका वडा नं. ६ बस्ने रमेश खरेलका छोरा २९ वर्षीय अनुक्रम खरेल रहेको प्रहरीले जनाएको छ।
निजलाई बुधबार साँझ करिब ५ बजे मलंगवा नगरपालिका वडा नं. १० स्थित साहारा गेष्ट हाउसमा नक्कली प्रहरी इन्स्पेक्टर बनेर होटल सञ्चालकलाई धम्की दिइरहेको सूचनाका आधारमा जिल्ला प्रहरी कार्यालयबाट खटिएको टोलीले  नियन्त्रणमा लिएको हो। प्रहरीले गरेको प्रारम्भिक अनुसन्धानमा उनी नेपाल प्रहरीको इन्स्पेक्टर नभएको पुष्टि भएको छ। शरीर खानतलासी गर्दा खरेलको साथबाट प्रतिबन्धित लागू औषध स्पास्मोको तीन पत्ता (२४ वटा ट्याबलेट) फेला परेको प्रहरीले जनाएको छ।
बरामद लागू औषधसहित उनलाई नियन्त्रणमा लिई थप अनुसन्धान भइरहेको जिप्रका सर्लाहीका प्रवक्ता एवं डिएसपी सरोज राईले जनाएको छ।