७ किलो गाँजासहित दुई भारतीय नागरिक पक्राउ

लोकतन्त्र समाचारदाता—
सर्लाही,चैत २१
सर्लाहीको ईश्वरपुर नगरपालिका–१२ बाँके खोलाको ड्याम क्षेत्रबाट  ७ केजी २१० ग्राम लागुऔषध गाँजासहित दुई भारतीय नागरिक पक्राउ परेका छन्। विशेष सुराकीको आधारमा गएका अस्थायी प्रहरी पोस्ट कालिन्जोर घारीबथान तथा  इलाका प्रहरी कार्यालय केशरगंजको संयुक्त प्रहरी टोलीले मंगलबार राति करिब ८ बजे ज १२ प ९०९९ नम्बरको मोटरसाइकल रोकी चेकजाँच गर्दा उक्त परिमाणको गाँजा बरामद गरेको हो।
पक्राउ पर्नेमा भारत, बिहार राज्य, सीतामढी जिल्लाको सोनवर्षा थाना अन्तर्गत इन्दरवा सहोरवा गाउँका ३० वर्षीय शम्भु कुमार कुशवाहा र सोही ठाउँका २५ वर्षीय संजय ठाकुर शर्मा रहेका छन्। उनीहरूले मोटरसाइकलको बीच भागमा प्लास्टिकले बेरेर गाँजा लुकाएर ल्याउँदै गरेको प्रहरीले जनाएको छ।
बरामद गाँजा, मोटरसाइकल र पक्राउ परेका दुवैजनालाई आवश्यक कारबाहीका लागि इलाका प्रहरी कार्यालय केशरगंज पठाइएको प्रहरीले जनाएको छ।