बसबरिया हत्या प्रकरणमा दोषी पक्राउको माग, सुनुवाइ नभए आन्दोलनको चेतावनी

लोकतन्त्र समाचारदाता-
सर्लाही,चैत १०
जिल्ला प्रशासन कार्यालय सर्लाहीमा दलित अधिकारकर्मीहरूले बसबरिया हत्या प्रकरणमा संलग्न दोषीलाई तत्काल पक्राउ गर्न माग गरेका छन्। राष्ट्रिय सभा सदस्य राधेश्याम पासवानको नेतृत्वमा शुक्रबार प्रमुख जिल्ला अधिकारी तुलसी बहादुर श्रेष्ठलाई भेटी उनीहरूले हत्यामा संलग्न अपराधीलाई कानुनी कारबाहीको दायरामा ल्याउन माग गरेका हुन्।
बसबरिया गाउँपालिका वडा न(२ का २५ वर्षीय राजीव पासवानको टाउकोमा छुरा प्रहार गरी हत्या गरिएको थियो। घटनामा संलग्न भएको आरोपमा सोही ठाउँका शिवजी यादव र धनञ्जय यादवलाई पक्राउ गर्न दबाब दिइएको छ।
पीडित पक्ष र दलित अधिकारकर्मीहरूले दोषीहरूलाई शीघ्र कानुनी दायरामा ल्याउन प्रशासनलाई आग्रह गरेका छन्। उनीहरूले माग सम्बोधन नभए कडा आन्दोलन गर्ने चेतावनी समेत दिएका छन्।