इजरायलमा सुरक्षित स्थानमा बसिरहेका विपिनका साथीहरु भने लामो प्रयासपछि सम्पर्कमा आएका छन् । किशोरलाई उनीहरुले बताए अनुसार हमासले आक्रमण गरेपछि विपिन साथीहरुको सम्पर्कमा आएका थिए । तर त्यसपछि भने सम्पर्क हुन सकेको छैन । ‘मेरो सम्पर्कमा आएका भाइको एकजना साथीले आक्रमणपछि उद्धार गरिदिनुस् भनेर हामीसँग आग्रह गरेको थियो भन्छन् तर अहिलेसम्म कुनै पत्तो लागेको छैन,’ किशोरले अनलाइनखबरसँग भने ।
‘भाइसँग शनिबारका दिन दिउँसो कुरा भएको थियो । सबै ठीकै छ, काम पनि राम्रो चलिरहेको छ । खाना खाइरहेको छु दाजु, पछि कुरा गरौंला है भनेर फोन राख्यो,’ केही विद्यार्थीहरु अस्पतालमा उपचारमा छन् भन्ने सुनेका किशोरले भने, ‘भाइ उपचारमै भए पनि हुने थियो, तर यकिन गर्न सकिएको छैन ।’
आक्रमणपछि पनि साथीहरुसँग एकपटक सम्पर्कमा आएका कारण विपिन सकुशल छन् भन्नेमा किशोर र उनको परिवार आशावादी छ । ‘इजरायल गएको भाइ भेटिएन घाइते भएको भए भेटिनुपर्ने हो । जहाँ भए पनि ऊ सकुशल होला भन्ने आशा जीवितै छ,’ दाजु किशोरले भने ।
अहिले किशोरको दिनचर्या भाइसँग सम्पर्क जुटाउने प्रयासमै बितिरहेको छ । सोमबार पनि विपिनको अवस्था पत्ता लगाउने प्रयास गरे पनि राति अबेर भइसक्यो भन्दै जानकारी नदिइएको उनको गुनासो छ । ‘सरकारले अफिसियली हिसाबले कुरा गरेर भाइको अवस्थाबारे चासो दिए आभारी हुने थिएँ,’ उनले भने ।
विपिन किशोरका काकाका छोरा हुन् । घरमा उनीसहित दुई जना भाइबहिनी छन् । उनी गत भदौमा मात्र सुदूरपश्चिम विश्वविद्यालयबाट कृषि विज्ञान विषयको अध्ययन सकेर इजरायल गएका थिए । अनलाइन खबर